2009/12/29

Zurrumurruak eta Urte Berri on !!!



Tira, 2009 urtea amaitzear dagoen honetan, hurrengoari begira hastea besterik ez zaigu geratzen. Aurrekoan gaizki egindakoetatik ikasi, eta 2010ean hobeto aritzeko ahaleginak egin.

Hori horrela, zurrumurruen munduan gabiltza Donostiarran zer gertatzen den jakin nahian. Duela aste gutxi oso beltza zen panorama, antza: esponsorrik ez, dirurik ez, kanpotik arraunlari onik ekarri ezin, eta, panorama horren aurrean, etxekoak ere alde egiten. Dirudienez, egoerari buelta ematekotan dira zuzendaritzakoak: esponsor indartsua lortu omen dute (zein den ezin esan, baina entzun dudanez, ezaguna izan daiteke), eta horren harian, maila dezenteko hainbat arraunlari ezagun erakartzeko bidean omen dira donostiarrak. Izen batzuk badabiltza hor zehar bolo-bolo, baina nahiago ezertxo ere ez esan, "omen" horiek denak errealitate bihur daitezen arte.

Datorren urtea on-ona izan dadila denontzat, eta Donostiarrak eta Donostiako arraunak pausotxo bat aurrera egin dezala bere sendotze progresioan.

Zurrumurruak eta Urte Berri On denoi!!!

2009/12/23

1959: Pasai Donibaneko Pietate bitxia



Argazki hau ez da donostiarrena, eta ez du Donostiarekin zuzenean zerikusirik, Kontxan egina dela ez bada. Baina, hala ere, blog honetan jartzea erabaki dut, merezi duelakoan. Uste dut Amara Zaharreko La Barranquesa jatetxe ezagunean ikusi nuela lehen aldiz argazki hori. Eta, gerora, inguruko janari-denda batean ere zintzilikatuta egon zela iruditzen zait. Beti pentsatu izan dut argazki ederra, estetikoa eta gogorra dela. Kirol honen alderdi latz eta ia epikoa etorri zitzaidan gogora, ikusi nuen lehen aldian.
Bitxikeria gisa, traineruaren branka aldean Pietate edo Pietá moduko konposizio kuriosoa agertzen da: arraunlari bat, leher eginda, beste baten magalean datza, Jesukristo eta Ama Birjinak eratutako irudi dramatiko ezagunaren modura.
Diario Vascoko artikulu honetan zehazten da argazki horren nondik norakoa. 1959ko Kontxako Banderan ateratakoa da irudia, eta Pasai Donibaneko Yola klubeko tripulazioa ageri da bertan. Hona hemen ontzian ageri direnak: Bibiano Etxabe, patroi; arraunlariak, ababorrean, Manuel Etxabe, Felix Makazaga, Iñaki Lopetegi, Carmelo Garmendia, Esteban Sagarzazu eta Miguel Goikoetxea; istriborrean, Imanol Goikoetxea, Joxe Salaberria, Antonio Legorburu, Anakel Garmendia, Miguel Egaña, Joxe Mari Karrere eta Ramon Goikoetxea.

Pietatean, berriz, Joxe Salaberria da "Jesukristo", eta Imanol Goikoetxea "Ama Birjina".

2009/12/11

1948: Franco Kontxako Banderan hiltzeko saioa

Bai, ondo irakurri duzue. Lehenagoko blog-sarrera batean aipatu nuenez, diktadorea, Donostiara uda pasatzera etortzen zenean, Kontxako Bandera ikustera etorri zalea zen; eta, egoera hori aprobetxatu nahiean-edo, uretan traineruak jo eta ke ari ziren unean Franco atentatuan hiltzea bururatu zitzaien anarkista batzuei 1948an.

Ez pentsa, gainera, asmoa nolanahikoa zenik, hegazkinez bonbardaketa egitea baitzen plana. Ez didazue esango ez denik oso irudi zinematografikoa: marko inkonparablea, traineruak lehian itsasoan, bazterrak milaka pertsona oihularirekin gainezka... eta, hara, zeruan hegazkin bat agertu hegaldi arinean, bonbak askatu, eta "daanbaaaaa!!" Francoren itsasontzia milaka zati eta printzatan lehertuta eztanda lehor batean.
Laureano Cerrada Santosek jarri zuen martxan atentatua. CNTko kide hau, Gerra Zibilean borrokatu eta gero, Frantziara ihes egin eta erresistentzian aritu zen naziek okupatutako aldean. II. Mundu Gerra amaitzean, Franco borrokatzeko xedeari ekin zion. Franco hiltzea izango zuen helburu, hain justu. Eta, zer okurrituko eta, traineru festa aprobetxatuz, diktadorearen itsasontzia hegazkinez bonbardatzea.

Horren atentatu berezia egiteko, hegazkina behar zuen aurrena. “Nord 1202/II Norécrin II” modeloko abioi kaxkar bat eskuratu zuen ("bizikleta bat", atentatuan parte hartu zutenen hitzetan). Kaxkarra, baina 175 kilo lehergai eramateko modukoa. Azpialdean, fuselajea zulatu eta arrapala erako batzuk eratu zituzten, bonbak bertatik askatzeko.

Hala, 1948ko irailaren 12an, Banderaren bigarren jardunaldian, ordubata aldera, Hondarribia eta Pedreñaren lehiak bazterrak sututa zituen unean, abioi bat azaldu zen Donostiako zeruan, pirueta bereziak eginez. Kirol-festaren barruko beste ikuskizun bat zela pentsatu zuten askok, baina ez, Frantzia aldetik aireraturiko bonba-hegazkina zen. Plana pentsatu bezala zihoala uste izango zuten anarkistek, seguru asko...

Alabaina, Francoren itsasontziaren bertikala hartzea lortzeko aukera izan baino askoz lehenago, armadako hidroabioi bat eta kaza batzuk hurbildu zitzaizkien hegan. Maniobra batzuk egiten saiatu arren, argi ikusi zuten berehala ihes egitea beste aukerarik ez zutela. Gainera, itsasontziko kanoi antiaereoak hegazkinerantz apuntatzen hasi zirela ere konturatu ziren. Bonbak nola-hala bota-ez-bota zalantzan izan ziren pixka batean, baina ez botatzea erabaki zuten azkenean. “Ni una bomba en el barrio de los pescadores, todas para el pescador de agua dulce” omen zen kontsigna. Azken maniobra bat baliatuz, hanka egitea lortu zuten.

Luze eztabaidatu izan da zerk huts egin zuen. Norbaitek abisua eman zuela da uste zabalduena, txibatazoa izan zela, alegia. Kontuak kontu, Cerrada ez zen amore ematekoa, eta beste atentatu saio batzuk burutatu zitzaizkion, Aieteko jauregian egitekoa, adibidez. Horiek, ordea, beste leku baterako istorioak dira.

Gertakari honi buruz gehiago jakin nahi duenak, jo dezala hona edo hona, edo azken web orri horretan azaldutako bibiografiara. Eta, liburu horietatik, hona bereziki: Los atentados contra Franco, Eliseo Bayo, Plaza & Janes, 1976.

Hona hemen, traineru-estropada horretan Franco erakusten duen NO-DOa. Hondarribitarren eta Pedreñakoen arteko lehia aipatzen da, eta donostiar ugari Alderdi-Ederren diktadoreari agur egiten. Atentatu-saiakeraz, baina, ez da ezer esaten, noski:




(Argazkiak: Laureano Cerrada eta atentatuan erabilitako hegazkin modeloa. Iturria: diariodevurgos.com)

2009/12/02

Clavijo loiolatarrak ergometro maratoiko marka lortu du



Gaurko Irutxuloko HITZAn kontatu zaigu Joseba Clavijo arraunlari loiolatarrak ergometro gaineko maratoi distantziaren aurtengo munduko markarik onena lortu duela. 2007an egin zuen saioa lehen aldiz, eta 2 ordu 59 minutu 27 segundo eta 9 ehunen behar izan zituen 42,195 "metroak" egiteko. Joan den asteburuan, berriz, 20 minututan hobetu zuen marka, 2 ordu 39 minutu 32 segundo eta 9 ehuneneko denbora ezarrita.

Albistean aipatzen denez, baliteke Joseba Clavijo aurten Donostiarran aritzea. Hala balitz, berak entrenatutako hainbat arraunlari izango lituzte tostakide, Ur-Kirolaken arraun egindakoa eta bertako entrenatzaile izandakoa baita Clavijo.

2009/11/18

1.000 bazkide biltzeko beste saio bat



Antza denez, bazkide gehiago biltzeko beste kanpaina bati ekingo dio laster Donostiarrak. Oraingo 600eko kopurua gainditu eta 1.000 bazkide lortzea omen da helburua. Era berean, bazkideei arreta pixka bat eskaintzen hasiko dira, txartela helaraziko baitzaie.

Buruhauste ugari izango ditu, dudarik gabe, zuzendaritzak, ez baitira garai gozoak hauek arraun talde baten denboraldia kirol eta ekonomia aldetik zuzendu behar dutenentzat. Baina bazkideak ere taldearen ondarea dira, eta behar bezala zaindu behar dira, eta informazioa eta arreta eskaini.

Ea, ba, zortea duten kanpaina berri horretan.

2009/11/15

350 arraunean Benta Berrin



Atzo 350 kiroilari baino gehiago izan ziren arraunean, ergometroari tiraka, Benta Berriko kiroldegian, Donostiako XI. Indoor Herri estropadan. Bertakoez gainera, kanpotik etorritako hainbat kirolari izan zirela jakinarazi du Irutxuloko HITZAko albisteak.

Emaitzak ikusi nahi badituzue, dokumentu honetan ageri dira denborak, kategorien arabera sailkatuta.

2009/11/11

Tornozulotik HITZAn berriro !!

Donostia eta arrauna uztartzeko bokazioa duen blog xume hau Irutxuloko HITZAn aipatu zuten irailean, egunkari horrek Kontxako Banderaren harira argitaratutako gehigarrian. Berri pozgarria izan zen honako blogari honentzat. Berriro ere pozteko gaia eman dit egunkari arraunzale donostiarrak, blogaren beste ezaugarri bat plazaratzen baitu HITZAk gaurko alean: bertsoak.

Blogari begiratu arin bait ematea besterik ez dago, istorio zaharrak kontatzeko zaletasuna dudala ikusteko; eta, bertsoak izan dira, luzaro, istorio jakingarriak gizarteratzeko baliabide erakargarrienetako bat. Han eta hemen bildu ditudan istorio eta bertsoak zuenganatu nahi izan ditut: adibidez, gaurkotasuna izanagatik aspaldikoa den donostiarren arteko ikamika; 1915ean oriotarrak, donostiarrak eta hilkutxa baten inguruko istorio xelebrea, XIX. mendeko getariarren eta donostiarren arteko batel-desafioa, edo 1925eko Ur-Kirolakeko arraunlarien balentria mingarria. Azken istorio hau hartu du hizpide Irutxuloko HITZAk arraunak eta bertsoak duten lotura aipatzeko.

Berriro ere, egunkari horri eskerrak eman beharrean nago, arraunari eskaintzen dioten atentzioa ez delako nolanahikoa eta nire bloga hainbesteraino kontuan hartzea oso pozgarria delako niretzat. Nire eskerrona behar bezala ez dakit ondo adieraziko dudan, eta, bertso gaietan ari garenez, Manuel Lasarte handiaren bitartez hitz hauek esan nahi nizkioke HITZAri, leitzarrak direlakoan:

Gaur erregaliz jantzi naute ta
pozik arkitzen naiz ziñez.
Nik onenbeste merezi nunik
nago siñistu eziñez,
baiña leitzarrak gaur denak egin
dute borondate fiñez.
Kezka bat daukat, zuekin zorrak
nola ordaindu jakin ez.

GBC saskibaoi-taldea Donostiarrari arnas ematen



Gipuzkoa Basket Club (GBC) saskibaloi-taldeak arnas eman nahi dio Donostiarra traineruaren ekimenari, eta hori publikoki plazaratu nahi izan zuten atzo, ekitaldi sinboliko batean, Gorka Ramoneda GBCko presidenteak eta Alberto Goitia Kaiarribakoak.

(Argazkia: estropa.net)

2009/11/05

Gora Ur-Kirolak 1925

Joan den astean Ur-Kirolakek 1925ean oinazez irabazitakoa kontatu nuen, eta ARGIA astekariko kronika bat ere gehitu nizuen. Astekari horren hurrengo alearen azalean, 1925eko abuztuaren 30ekoan, honako bertso hauek argitaratu ziren, garaipen haren omenez.



(Irudia: ARGIA aldizkariko hemeroteka)

2009/11/04

Bilera udaletxean



Atzo bilera izan zuten, Udaletxean, Donostiarrako zuzendaritzak eta udaleko kirol-arduradunek. Krisi garai hauetan udalak proiektuarekin izango duen inplikazioa jakin nahi zuten, eta, antza, udalak ez du bere laguntza jaitsiko. 125.000 euro jasoko ditu klubak aurten ere, beraz.

Baina, beste babesle nagusi baten bila dabil Donostiarra, etorkizuneko bidea sendo oinarritzeko, Construcciones Moyua proiektutik joan zenetik babesle nagusi gabe izan baitzen aurreko denboraldian. Hurrengo denboraldirako babeslea bilatzeko lan horretan Udalaren laguntza nahiko luke klubak.


Kontua da oraintxe dela plantilla zehaztuta izateko edo zehazten aritzeko garaia, eta, babeslerik izango den edo babesle horrek zenbat emango duen jakin ezean, nekez egin ahal izango zaiela proposamen zehatzik arraunlariei. Are gehiago, arriskutsua izan liteke bete ezin izango diren promesak egitea, aurten ikusi den bezala.

Albiste honetan dioenez, Mendi izango da aurten ere entrenatzaile, osasun arazoak guztiz gaindituta ez baditu ere, eta plantilla landu eta finkatzeko lanetan dihartu, aurrekontua zehaztu gabe izateak sortzen duen eragozpen handiarekin.

Espero dezagun, hala ere, urrats bat egingo duela aurrera Donostiarrak, eta ez dela beste trantsizio denboraldi bat metatuko. Latza litzateke.

2009/10/26

Ur-Kirolak 1925: Ipurmasailak odoletan



Ipurmasailak minbera, larrututa eta are odoletan izatea, arraunlariek hurbiletik ezagutzen duten kontua da. Tentu handiz zaindu eta zaildu beharrekoa da tostan hain marruskadura-saio gogorretan erabiltzen den ipurdi-alderdi hori. Duela gutxi Korta berak azaltzen zuen telebistan, gordintasun osoz, arraunean hasi zen garai hartan maindireak ipurdian literalki itsatsita esnatzen zela hainbatetan. Gaur kontatu nahi dizuedan istorioa, ordea, ez da arraunlarien ohiko ipurdi-min horiei buruzkoa, istripu batek eragindakoa baizik.

Ur-Kirolak 1922an sortu zuten arraunzale donostiar batzuek, aulki mugikorrean aritzeko zaletasunak bultzatuta. Lehiatzeko yolarik ez zutela-eta, bat beren kasa eraikitzea erabaki zuten. Baina plano eta informazio askorik gabekoak izaki, nahiko ontzi zatarra atera omen zitzaien: Euskotarra. Ez zen arraunerako ontzi baliagarria, eta irtenbide bat bilatu beharra zegoen, hartaz. Club Nauticoko biltegietan erdi ahaztuta zegoen yola zahar bat eskatu zioten klub horri, eta pixka bat zaharberritu eta gero, Urkik izan zuen bere lehen yola "lehiakorra": Antziak (ikus goiko argazkia). Halamoduzko ontzi horrekin 1924an Espainiako txapelketara joan eta irabazi egin zuten.

Jakina, irabazteko asmo berarekin joan ziren 1925ean Alacant aldera Angel Lizarraga, Agustin Lacoste, Jose Etxeberria eta Gaspar Iparragarai arraunlariak, Mariano Larrandia lemazainarekin batera. Hona hemen tripulazioa. Arraunketako teknika ez omen zuten oso landua aulki mugikorrerako, baina kementsuak eta gogo berokoak izateak konpentsatzen zuen gabezia hori. Eta kartsutasun hura frogatu beharra gertatuko zitzaion arraunlari bati estropada erdian. Izan ere, txapelketa lehiatzen jo eta su ari zirela, eserlekuko orga lekutik irten egin zitzaion Lizarragari, eta zuzenean errailen gainean eserita geratu zen. Hala, ipurdia aurrera eta atzera horren mingarriki zigortuz jarraitu behar izan zuen arraunean. Ez zen giro izango azpialde horretan! Hala ere, hortzak estutu eta ekinez, txapelketa irabazi ahal izan zuen Ur-Kirolakeko laukoteak:

1. Antziak (Ur-Kirolak), 7:47
2. Irrintzi (Club Nautico Donostia), 7:53
3. Arrea (Alacant), 7:59
4. Morato (Bartzelona), 8:13
5. Yo (Tarragona), 8:34

Era arranditsu eta bizi honetan kontatu zuen balentria hura Argia aldizkariak, 1925eko abuztuaren 23ko alean (beheko irudian ondo irakurtzen ez baduzu, egin klik esteka honetan):



Hala ere, agian ipurdiko min lazgarri horren arriskuari gehiegi iritzita-edo, ontzi berria eduki beharko zutela pentsatu zuten donostiarrek. Real Sociedadek sustatutako diru-biltze bati esker, Italian yola bat eraikitzeko adina eskuratu zuek Urkik: Ametza ontzia. Ondo eskertuko zuen Lizarragaren atzealdeak.

(Lehen argazkia: Ur-Kirolak)
(Bigarren irudia: Argia aldizkariko hemeroteka)

2009/10/19

Animo Mendi !!



Todoremo.com
foroan esan dutenez, Donostiarrako entrenatzaile Joserra Mendizabal, Mendi, Zaintza Intentsiboetako Unitatean (UVIn) omen dago, ostiraletik, odol-zirkulazioko arazo bat dela-eta.

Bihoakio hemendik besarkadarik handiena berari, eta bere senitarteko guztiei. Une latz hauetan, beste baterako utziko dugu horrek ekar ditzakeen kirol-ondorioei buruzko gogoeta; pertsona baikara beste ezeren aurretik, eta beste ezer baino lehenago.

Animo Mendi, eutsi gogor. Maite zaituztenek behar zaituzte. Donostiako arraunak behar zaitu.

(Argazkia: Diario Vasco)

2009/10/15

Facebook-era iritsi da Tornozulotik



Nire adiskide arraunzale bat ez da oso pozik egongo, eta barkamena eskatu beharko diot igual. Adiskide horrek ez du ulertzen zertan ibiltzen den hainbeste jende Facebook eta antzeko sare sozial horietan. Ez du ulertzen zertan lagun dezaketen horren tresna hotz eta artifizialek harremanak eratzen. Bere iritziz, harremanak gauza sinpleagoa dira, hainbeste alanbike bihurri erabili beharrik gabekoa: bere ustez, nahikoa da, Iztuetak zioen bezala, diosal moduan emandako bizkarreko sendo bat, adiskidetasun beroena adierazteko. Lege zaharrean, ze arraio. Utikan formulismo txepelak eta gehiegizko legamiak. Adiskidetasuna beroan landu behar dela dio, aurrez aurre eta zuzenean, eta askoz hobe, gainera, mahai baten inguruan edo garagardo fresko baten aurrean egiten bada. Hainbesteko ezinikusia die horrelako kontuei, bere kasa kamiseta bat diseinatu eta soinean jantzita poz-pozik erakutsi zidan lehengoan: "NOT IN FACEBOOK" dio, letra zuri handiz, kamiseta urdin hark.

Nik ez dut maiz pentsatu gai horren inguruan, eta zuzeneko harremanen aldekoa banaiz ere (izan ere, adiskide horren eta bion artekoa mahai, terraza eta garagardo artean ere mamitutakoa baita, eta ez dago damurik, ez horixe), a priori ez dut sekula ezertxo ere izan sare sozial horien kontra. Hala ere, ez dut parte hartzeko asmorik izan inoiz.

Kontua da duela egun batzuk estropa.net webgune bikaineko lagunek Facebook-eko adiskide izateko eskaera egin zidatela. Eta ni, zer zen asko jakin gabe ere, ba, eskaera onartu eta sare horretara sartu nintzen. Espero dut nire adiskidea ulerkorra izango dela; azken batean, ez naiz ni izen eta abizenez sartu Facebook-era, Facebook bera bezain tresna hotz eta artifizial bat sartu da: bloga. Facebook-en egin ditudan saio lotsati eta apurretan, baten bati bidali diot harreman-eskaera, eta beste batzuek ere eskaera luzatu didate neroni. Sare txikia eratu dut, inondik ere, baina tira, aparteko asmo handirik gabekoa da blog hau, ze demontre. Aritu beharrean nabil oraindik, hala ere; ez naiz oso eroso sentitzen oraindik tresna maneiatzen, eta ez dakit zer-nolako jokoa emango didan.

Baina tira, hor duzue berria eta gonbita: Tornozulotik Bloga (hori baita Facebook-eko ierabiltzaile-zena) sare horretan dago, eta nahi duenak hor dauka adiskide gisa agregatzeko aukera. Adiskide beharra izango dut, agian... zalantza baitut kamiseta urdin ederreko bat ez ote dudan galduko (egia esan, bi kamiseta eder dauzka, Donostiarrarena ere ezin dotoreago luzitzen baitu sarri han eta hemengo estropadei begira). Batek daki.

2009/10/13

Anaitasunezko afaria Artesanan



Opor egunak dira hauek Donostiarrako arraunlari, entrenatzaile eta zuzendarientzat. Tira, ez hainbeste azken bi talde horretakoentzat, lanean ariko baitira taldea prestatzen, datorren urteko denboraldiari ahalik eta modurik onenean aurre egin ahal izateko. Zurrumurruak ugari dira, etor litezkeen arraunlarien inguruan, baina egiazko berririk oraindik bat ere ez.

Bitartean, atseden eta ospakizun garaia da arraunlari eta zaletuentzat. Joan den ostiralean, anaitasunezko afari bat egin zen Union Artesanan; jakina da soziedade hori oso inplikatua dagoela Donostiarrako zuzendaritzan, eta soziedadeak arraun-taldeari egindako omenarekin batera, soziedadeari eskerrona adierazteko baliatu zuen taldeak afari hura. Elkarte gonbidatzaileko kideekin batera, Donostiarrako A eta B taldeetako hainbat arraunlari, entrenatzaileak, zuzendaritzako kideak eta enpresa babesleetako ordezkariak batu ziren, bai eta Ur-Kirolak, Arraun Lagunak eta Fortunako lagun batzuk ere.

Bertan jakitera eman zen 500 bazkide batu direla ia proiektura. Gutxitxo, akaso, Donostia batentzat; baina hori da gure inplikazioaren neurria, tamalez.
Afariari buruzko argibide xeheak ematen dira albiste honetan.

PD: Joti, taldearen izena Donostiarra da, edo la (trainera) Donostiarra, erdaraz enpeñatzen bazara; baina inola ere ez La Donostiarra. Ez da lehen aldia egunkari horretan horrela idatzita ikusten dudana.
(Argazkia: Diario Vasco)

2009/09/30

Aio, Patxi, aio !!!



Jakina da ikusmin nabarmena sortzen dutela Kontxako estropadek. Era guztietako arraunzale eta ikusleak bildu izan ohi ditu, arraunlarien jardunaz gozatzeko. Ez dakit argazkian agur egiten ari den gixon hori oso arraunzalea zen, edo, besterik gabe, jende asko biltzen zen lekuan subditoen estimu pixka baten bila etortzen zen. Hala ere, hortxe dugu Francisco Franco diktadorea, Azor itsasontziaren karelera hurbilduta, traineruen aurrean, poz pozik.

Francok Donostian igaro ohi zituen udarak jorratzen dituen liburu bat aurkeztu berri du Javier Maria Sada kronistak, eta, horrek gogorarazi digu diktadoreak banderan izan ohi zuen protagonismo punttua. Argazkia 1969ko estropadetakoa da; beraz, Lasarte-Michelineko Klaudio Etxeberriak pasatu behar izan zuen urte hartan bandera hain esku nazkagarrietatik jasotzeko tragoa. Gure historiaren zati dira, eta ez da ahaztea komeni.

(Argazkia: Kutxa Fototeka)

2009/09/23

1945eko Espainiako Txapelketa



Diario Vascok dakarren artikulu honek, Donostiako arraunaren anekdota bitxi bat dakarkigu gogora, 1945ean Donostiak traineruen Espainiako Txapelketa irabazi zuenekoa. Duela urtebeteko beste artikulu honetan, txapelketa horri buruzko beste hainbat argibide ematen dira. Kuriosoa da kontraesana dagoela bi artikuluotan traineruaren izenaren inguruan, lehenengoan La Teresita izena du traineru donostiarrak; bigarrenean, berriz, La Donostiarra.

Artikuluotan esaten dena laburbilduz: urte hartan, Pedreña, Kaiku, Hondarribia eta San Pedrok zuten txapelketa jokatzeko eskubidea. Pasaitarrek uko egin zioten joateari, eta antolatzaileek erabaki zuten Donostiak parte har zezala haien ordez. Presaka, tripulazio bat biltzea lortu zuen Eustakio Iraola Famao patroi ezagunak. Donostiarren parte-hartzearekin ados egon ez eta, ikamikak izan ziren estropada aurreko orduetan, Kaiku eta Pedreñak donostiarrak kale txarrenera eramateko proposamena ere egin omen zuten; azkenik, sestaotarrak eta kantabriarrak ez ziren irteerara aurkeztu.

Irten ziren, beraz, beste bi gipuzkoarrak, itsaso zakarrera, eta donostiarrek irabazi zuten txapela. Hona hemen tripulazio irabazlea: Famao patroi, eta tostetan Ramon Indo, Esteban Azkue, Luis Gaztañazpi, Joaquin Fresnedo, Segundo Manterola, Bautista Oliden eta Jose Mari Zumeta oriotarrak, eta Felipe Zumeta, Jose Mari Jauregi, Antonio Yarza, Pablo Agote, Pedro San Martín eta Jose Galdos donostiarrak. Ordezkoak: Amado Inda, patroia; eta Jose Vaqueriza donostiarra eta Santiago Arrillaga oriotarra.

(Argazkia: Diario Vasco - Kutxa)

2009/09/20

Gabi Larrinaga: donostiar arraunlari handia



Duela hamar bat egun, Gabi Larrinaga (1975) arraunlari donostiarrari elkarrizketa egin zion BERRIA egunkariak. Kontxako Banderaren zurrunbiloa zela-eta, ahaztu egin zitzaidan horren berri ematea blog honetan.
Azken urteotan Donostiak izan duen arraunlari onenetako eta ezagunenetako bat da Gabi Larrinaga, sei taldetan ibilia da eta Kontxan 14 partaidetza izan ditu (1995ean irabazi zuen). Bere kirol-ibilbidearen nondik norakoak kontatzen dizkigu elkarrizketa honetan: Arraun Lagunak, Donibaneko, Pasai Donibane, Orio, Zarautz eta San Pedro taldeetan izan duen ibilera, joan-etorrien zergatia, eduki dituen taldekideak, eta etorkizunerako dituen asmoak. Elkarrizketa interesgarria.

2009/09/14

Donostiarra Kontxako banderan: 2. jardunaldia



Kontxako Banderaren bigarran jardunaldian, Kaikuk aho bete hortz utzi gintuen guztiok; hainbestekoa izan zen bere nagusitasuna. Donostiarrari dagokionez, lehenenego igandean baino zertxobait okerrago aritu zen: 20:57,72 egin zuen, irabazlearengandik 1;34ra (hona hemen denbora guztiak). Baina Mendi entrenatzaileak esan zuen modura, iaz baino minutu eta erdi hobeto ibili dira irabazlearekiko, bi jardunaldiak batuta. Aurrera begira kontuan hartzeko datua izan liteke, pauso bat eman dela ikusteko-edo.

Era berean, aipatzekoa da aldaketak egin zituela tripulazioan, eta lehen jardunaldian aritu ez ziren hiru arraunlariak barruan jarri zituela Mendik bigarrenean. Denek izan dute, beraz, Kontxan jarduteko aukera.

Orain, ikusi beharko da nola ekiten zaion denboraldi berriari. Zuzendaritza eta bazkide berriak, diru-sarrerak eta denboraldia prestatzeko denbora nahikoa eskura izanik, eboluzioa ikusi beharko genuke datorren urtean. Hala bedi.

Argazkia: Irutxuloko HITZA

2009/09/13

Tornozulotik bloga Irutxuloko HITZAn



Irutxuloko HITZAk Kontxako Banderari buruz argitaratutako gehigarri berezian, blog xume honi tartetxo bat eskaintzea erabaki zuten egunkarri horretako kirol kazetariek. Gehigarriaren VII. orrialdean, blog hau sortzeko arrazoiak, nire arraunzaletasunaren nondik norakoak eta Donostiako arraunari buruzko iritzi batzuk irakurleen esku jartzea egoki iruditu zitzaien.

Eskerrak eman behar dizkiet, beraz, Estitxu Zabala kazetariari eta HITZAko gainerako adiskideei, eta nire iritziak balio eskasekoak direla iruditzen zaienei... ba, barkatu, aizue.

2009/09/12

Ur-Kirolakeko neskak Kontxan lehen aldiz




Kontxako banderan emakumezkoen traineru donostiar baten aurreneko saioa egin du gaur Ur Kirolak taldeak. Taldea osatzea kosta zitzaien, baina azkenean 17 arraunlari bildu zituzten, San Pedro, Koxtape eta Fortunako baten bat elkartuta, eta Zierbenako klubak utzi zizkien arraunak. Uztailean hasita, denbora gutxi izan dute Kiriko traineruan arraunkera bateratzeko, Tubal Lakuntza oriotarraren gidaritzapean.

Kanporaketan parte hartu guten 11 taldeen artean 10. iritsi dira neska donostiarrak. Norabait iristeko bidean garrantzitsuena lehen urratsa egitea omen denez, ezin aipatu gabe utzi aurten gertatutakoaren meritua Donostiako arraunarentzat. Hona hemen plantilla:

Aitziber Lizarralde Otegi
Alazne Esnaola Etxeberria
Alba Ayucar Castro
Amaiur Esnaola Illarreta
Ane Arbillaga Etxarri
Arantza Arregi Izagirre
Haizea Ibargarai Osa
Irati Altube Esparza
Irati Salsamendi Lozano
Izaro Garmendia Iruretagoiena
Josune Lizaso Mujika
Laura Goldaracena Unanue
Lurdex Etxeberria Zarautz
Miren Etxeberria Iriondo
Nora Ruiz Ceberio Aranzabal
Patricia Garmendia Freire
Saioa Simal Zabalo
Txelo Lopez Paris
Zuriñe Alberdi Iraola (Pat.)
Argazkia: todoremo.com

2009/09/08

Donostiarra Kontxako banderan: 1. jardunaldia




Kontxako banderaren lehen jardunaldian Donostiarrak eginiko lana balekoa izan dela uste dut. Jakina da itsaso barea izanik 20 minutura ahalik eta gehien hurbiltzea zela asmoa, eta irabazlearengandik minutu bat baino gehiago ez galtzea. 20:23,74 denbora egin zuten (hona hemen denbora guztiak), eta, marka hobexeagoa egingo zutela uste bazuten ere, ez da batere emaitza txarra Kaiku irabazle indartsutik 1:12ra iristea; kontuan hartuta, gainera, minutua baino gutxiago atera ziotela Hondarribia eta Pedreñak, 43 segundo eskas Urdaibaik eta 40 segundo besterik ez Oriok. Eta itxaropenerako datu bat: ziabogatik bueltan, poparean, itzulerako luzean, 12 segundo besterik ez zizkion kendu Urdaibaik, 14 Pedreñak eta 17 Oriok.

Ahazten ez badugu ipar-ekialdeko haizearekin txarrena den 4. kalea egokitu zitzaiela eta erantzukizunak sortutako nerbioak ere gainean izan zituztela, ez dira emaitza txarrak etorkizunari itxaropenez begiratzeko, traineru barruan 10 arraunlari propio (gehi iaz ere Donostiarran aritu zen 11. bat) aritu zirela jakinda. Oinarri itxaropentsua da hori, etorkizuna eraikitzen hasteko.
Datorren asterako, minututik jaisteko erronka bere gain hartu dute arraunlariek, lehen astean gaizki egindakoa ikasi dutelakoan; hona hemen Asier Lopez patroiaren adierazpenak.

Uretatik kanpora, pozgarria izan zen arraunzale ugari Donostiarraren kamiseta erostera animatu zirela jakitea (300dik gora saldu omen ziren); ikusi behintzat asko ikusi nituen kamiseta soinean zeramatela, Kaiko eta Parte Zaharreko zaletu uholde koloretsuan. Balkoi batzuk (espero baino gutxiago, ordea) bandera zintzilika dutela ere ikus daiteke. Era berean, itxura ganorazkoa zuen traineruak, kolore zuriz (edo urdin argiz?) eta babeslez hornitua, Kontxako uraren gainean. Gauzak martxan doazen seinale. Kaian saldu zituzten hegaluze pintxoak behintzat, oso goxoak zeuden. Zorionak zuzendaritzari.
Eta aupa Donostiarra!!

Argazkia: kaiarribadonostiarra.com

2009/09/02

1.000 bazkide lortzea helburu



Donostiarra traineruaren proiektua gizarteratzeko lanean gogor ari dira klubekoak; horren lekuko atzoko aurkezpena, bazkideak biltzeko ekimen berria aurkeztu baitzuen klubak atzo. Ekimen honetan, Gureak taldeko EgunOn zerbitzuaren lankidetza izango dute, herritarrei informazioa zabaltzeko eta bazkide egiteko bideak zehazteko. Gaur egun dauzkagun 400 bazkidetik 1.000 izatera omen da kanpaina berri honen helburua. Ez da ahaztu behar 1.000 bazkidek 30.000 euroko diru-sarrera eratuko luketela; ez da mauka makala klubaren diru-kutxarentzat.

30 soziedade gastronomikok ere 100 euroko ekarpena egingo dutela esan du Alberto Goitia presidenteak elkarrizketa honetan.

Beste puntu aipagarri bat da klubak, azkenean, webgune berria ireki duela (eskuineko esteken zerrendan duzue eskura). Arraunzaleentzat eta Donostiarrako bazkideentzat atari baliagarria eratzen badute, edukiz aberatsa eta informazio eguneratukoa, Internetek eskaintzen duen potentzialitateaz baliatzeko aukera eskainiko zaio Donostiako arraunari.

2009/08/30

Donostiarra: Liga denboraldia amaitu da


Amaitu da aurtengo KAE-ARC Liga. Kontxaren atarian, hainbat ondorio ateratzeko garaia da hau.

Kontuan hartzekoa da iaz eta aurten taldea eratzeko eta bideratzeko prozesuak eta epeak oso desberdinak izan direla, tamalez (ez ditugu xehetasunak eta arrazoiak berriro errepikatuko). Hala ere, emaitzak hortxe-hortxe ibili dira Donostiarra A traineruari dagokionez: aurten 88 puntu lortu dituzte 15 estropadatan (5,86 batez beste), iaz 81 puntu 14 estropadatan (5,78 batez beste). Denboraldian izandako bilakaera ere iazkoaren nahiko antzekoa izan da: sailkapenaren erdialdeko emaitzak lortzen hasi (helburua zen bezala), abuztu hasieran emaitza onenak lortu, eta abuztu amaieran emaitza kaskarrenak; Kontxari begira egindako lan kargaren eraginez, seguruenik. Ea aurten Kontxan iazkoa hobetzerik duten; aurrerapausu baten seinale izango litzateke, datozen urteetan emango omen den jauziaren atari gisa-edo.

B taldean berriz, gorabehera asko izan diren arren (gertatu behar ez luketen itsusikeriak barne) eta emaitzak erdipurdikoak izan badira ere, ontzat eman beharko da esperientzia, etorkizunari oinarria jartzeko lehen pausua izan delakoan. Harrobiko gaztetxoei lehiaketan murgiltzen hasteko aukera eman die B traineru honek, eta jarraipena izan dezala garapen-prozesu horrek datozen urteetan, benetan garrantzitsua baita hori etorkizuna eduki nahi duen talde batentzat. Hori bai, errepikatu behar ez diren gauzak bazterrean utzi behar lirateke betiko; eta seriotasun eta zintzotasun handiagoak exigitu beharko lizkioke zuzendaritzak hainbat teknikori.

Arraunlariek denboraldian izan duten egitekoa ikusi nahiz gero, hona hemen arraunlari bakoitzak jokatutako estropada kopurua:
DONOSTIARRA A
Aitor Aranegi 15
Andima Martinez 15
Ekain Iriarte 15
Hibai Fuente 15
Ibai Sistiaga 15
Jon Lizarralde 15
Patxi Olabe 14
Asier Lopez (Pat.) 13
Iagoba Bakero 13
Jon Sardon 13
Iñaki Fraile 11
Gorka Ibarluzea 10
Iñigo Collazo 10
Jon Quintana 10
Aritz Peiro 9
Unai Iparragirre 8
Telmo Yurramendi 7
Ion Fidalgo (Pat.) 2
Ander Iriarte 0
Imanol Brit 0

DONOSTIARRA B

Hodei Abaurrea 15
Iban Ramos 15
Oier Iurramendi 15
Jon Mayoz 14
Mikel Iradi 14
Xabier Zubiri 14
Andoni Lizaso (Pat.) 13
Lander Clemente 13
Mauricio Barros 13
Ricardo Ponce 13
Xabier Lezertua 13
Asier Urdangarin 12
Aitor Casis 11
Nikolas Yurramendi 8
Ekaitz De Ibero 7
Jokin Egaña 6
Alberto Domingo 5
Xabier De Diego 5
Elias Arruabarrena 2
Manu Roteta (Pat.) 2
Andres Fernandez 0

2009/08/20

Izurdearen fama eta botakarraren izana

Botakarra, Scomberesox saurus.
Demagun izurde bat eta botakar bat uretan ziztu bizian igerian ikusten ditugula, norgehiagoka larri batean lehiatzen. Jakinik bata bestaren harraparia dela, lehia orekatua izango al litzateke? Zein gertatuko litzateke irabazle?

Ez, ez, lasai... oraingoa ez baita itsasoko animaliei buruzko natura-dokumental bat, XIX. mendeko getariarren eta donostiarren arteko arraun-desafio bat baizik. Eta zer pintatzen dute, bada, bi animalia horiek istorio honetan? Ba, horiexek zirela desafio hartako ontzien izenak: Izurdia Getariakoa eta Potakorra Donostiakoa.

Desafioa Getarian jokatu zen; zein urtetan egin zen ezin dugu jakin zehazki, ez baitago data zehatzik adierazita inon. Hala ere, Antonio Zabala zenak Jose Manterolaren bilduman jasota topatu zituen egun hartako kontuak jorratzen dituzten bi bertso-paper. Hortaz, eta bilduma hori 1877koa denez, estropada nahitaez lehenagoko urteren batean gertatu zela badakigu behintzat. Bertso-paper horietako baten izenburua (Izurdiaren fama eta potakorraren izana) erabili dut, hain zuzen, idazki honi titulua jartzeko.

Dena delako urte hartan, nolabaiteko liskarra izan omen zen arraunlari getariarren eta donostiarren artean, Donostian lehenago antolatutako estropada bat zela medio: hainbat kontu eta eztabaidaren ondoren, ez zen estropada jokatzerik izan. Hurrengo egunetan, Donostiakoei errua botaz, Getarian burla eta mespretxu ugari ibili omen ziren airean donostiarren kontra. Azkenean, kontuak garbitzeko-edo, getariarrek desafioa bota zieten donostiarrei: batel-estropada bat, bosna arraunlari eta patroia izanik tripulazioa. Eta mila erreal jokoan; ez zen sari makala, garai haietarako.

Donostiarrek desafioa onartu, eta hitzartutako egunean hantxe agertu ziren Getarian batel gainean Donostiako gazteak, Anselmo patroiaren gidaritzapean. Eta bai gazteak izan ere donostiarrak, hamazazpi-hemezortzi urteko mutikoak baitziren. Getariako jendea seko harrituta geratu omen zen, gaztetxo haien itxura ikusita:

Allegatu ziraden
Getariko errira,
noski jendia franko
bazegon begira;
alkarri esanaz zeuden
alditik aldira:
"oiek estroparako
gizonak al dira?"

Apusturako lasta gisa, sei-zazpi arroa harri hartu zituzten donostiarrek, eta, bertso-paperetan esaten denez, hori ere txit barregarria izan omen zen getariarrentzat. Potakorra ea "pleiteroa" al zen (pleita edo karga eramaten zuen itsasontzia, alegia) eta antzeko burlen berri ematen da bertsoetan. Abiatu aurretik, orekarik gabeko norgehiagoka zirudien: gizaseme sendo eta zailduz osatutako izurdea, oraindik ia nerabe ziren gazte batzuez osatutako botakarraren aurka. Alabaina, uraren gainean giharrak dantzan hasi zirenean:

Gizon aulak zirala
galdubak petxutik,
indarrik etzutela
ibiltzeko txutik;
alere izurdiak
ez tragatziatik,
potakorrak utzi du
izurdia atzetik.

Oraiñdaño itxasuan
askok du ikusi:
izurdiak segita
potakorra igesi;
orain biyak pelian
diranian asi,
potakorra jarri da
izurdian nagusi.

Garaipen honek oso pozik jarri zituen, noski, donostiarrak. Ezustekoa eman eta mila erreal poltsikoratzeaz gainera, azkenaldi horretan jasan zituzten burlak kitatu zituzten getariarrekin. Eta, atzera, burlak beste aldera itzuli ziren:

Zubek eginak diran
burlaren erdiyak
jarri eztitugu emen
ez pentsa guziyak;
amarretatikan bost
dirade utziyak,
karanba getariyar
demontrez josiyak!

Adios, getariyarrak,
adios, ikusi arte,
ezer ofrezitutzen
bada eman parte;
Getariyatik ezta
Donostiya aparte,
adios, aje gabiak,
nai dezuten arte.

Azken lerro hauek une horretako sentimenen isla besterik ez dira, ez dakidala haserretu getariarrik. Arraunean garai onenak bizitzen ari ez diren bi herri historikoren omena izan dadila istoriotxo hau.

2009/08/15

Soziedadeak Donostiarrarekin bat eginez



Donostiako soziedade gastronomikoak Donostiarra traineruaren proiektuan inplikatuta daude. Jakina da Union Artesana ondo errotuta dagoela uztailean izendatu berri den zuzendaritzan. Eta, harreman-sare hori aprobetxatuta, beste soziedade asko ekimenarekin bat egin dezaten lortzeko bidean dira, traineruari dirutxo bat emanez, edo jendea bazkidetzara batzeko zereginean lagunduz.

Traineru berria gizarteratzeko lanean ari diren seinale, bart arratsean Donostiarraren bandera zintzilik ikusi genuen hainbat soziedadetan. Hemen jarri dudan argazkia, Kanpandegi kaleko Zubigain soziedadeko mastarena da. Hori bai, bandera buruz behera zintzilikatuta ikusi genuen, bai hemen eta bai Gaztelubiden ere; akats hori konpon dezala konpondu behar duenak.

Bestalde, bandera horiek, kamisetak eta Donostiarraren gainerako merchandising gauzak saltzen dituzte Lorea izeneko dendan, Portu eta Aingeru kaleen izkinan (Aingeru kaleko eskaileratik hurbilen dagoen izkinan).

2009/07/31

Donostiarra Euskadiko Txapelketan

Hondarribian jokatu den Euskadiko Traineru Txapelketan, Donostiarrak zazpigarren postua eskuratu du. San Pedro, Zarautz eta Zumaiak txapelketa horri uko egin diotelako aritu dira donostiarrak lehian. TKE mailako Arkote gainditu du, eta Kaiku ikusgarria aparte utzita, gainerakoengandik minututik behera iritsi da, Orio 29 segundo eskasera izanik, eta Urdaibai 39 segundora.

1. Kaiku 19:16:84
2. Hondarribia 19:34:17
3. Urdaibai 19:46:22
4. Orio 19:54:07
5. Santurtzi 20:11:90
6. Pasai Donibane 20:12:63
7. Donostiarra
20:25:27
8. Arkote 20:55:14

2009/07/30

Presidente berriaren asmoak



Alberto Goitiari, Donostiarra arraun-elkarteko presidente berriari elkarrizketa egin diote gaurko Irutxuloko HITZAn. Proiektua nola hartu duten, orain egin beharreko lana, eta etorkizunerako dituzten itxaropenak kontatzen dizkigu bertan.
Ekimenaren lema oraintxe hartu dutela-eta, pixkanaka joan behar dela dio, hankak lurrean ondo jarrita; hala ere funtsezko xedeen berri ematen digu: Donostian eta donostiarrengan ilusioa piztea, bazkide kopurua handitzea, zalegoa ikusgai egitea, bizpahiru urte barru ontzi lehiakorra eratzea, eta, oraindik urruneko helburua badirudi ere, kanpoan ari diren donostiar arraunlariak berriro etxeratzen saiatzea.
PD: Zorionik beroenak eman nahi dizkiot Irutxuloko HITZAri Donostiako arraunketari egiten dioten segimendu hain egokiarengatik. Bejondeizuela!

2009/07/28

Fortunako neskak TKE Ligan


Aurreko mezu batean esan bezala, hiru arraunlari donostiar ari dira emakumeen TKE Ligan: Amaia Dublang (Gros, 1976), Aloña Gastesi (Añorga, 1976) eta Maite Martin (Antigua, 1977).
Hirurak Fortuna taldekoak dira, eta Zumaia eta Hondarribiako tostetan ari dira aurten. Gaur, Irutxuloko HITZAn elkarrizketa egiten diete, beren kirol-ibilbidea eta kanpoko taldeetan aritzeko arrazoiak komentatzeko. Interesgarria iruditu zait niri.
Bukaeran esaten den esaldia, elkarrizketaren titulu gisa erabili dutena, aipagarria da: «Gezurra dirudi arraunak, kentzen duen guztiarekin, zenbat ematen duen».

2009/07/27

Zuzendaritza berriaren asmoak



Kaiarriba klubeko zuzendaritza berria ofizialki izendatu zen atzo, Ur-Kirolakeko Loiolako egoitzan (aurreko mezuan duzue kideen zerrenda). Ondorengo prentsaurrekoan, Alberto Goitia lehendakari berriak aditzera eman zituen klubaren lan-ildo eta asmoak.
Lehenik, klubaren kohesioa eta integrazio gogoa azpimarratu zituen, hau da, orain arteko kluben arteko ika-mikak baztertu eta Donostiarra traineruaren inguruan indarrak, ahaleginak eta ilusioak biltzeko gogoa. Donostiako herritarrak traineruarekin identifikatzea eta garai bateko zaletasuna eta ilusioa berriro piztea, funtsezko helburuak dira.
Herritarren inplikazioa lortzeko, proiektua gizarteratzeko ahalegina egingo dute: bazkideak biltzeko kanpaina berri beti ekingo zaio, "Donostiarra naizelako, porque soy donostiarra" lelopean. Lehen urratsa karpa batzuk ezartzea izango da, bai Donostia-Donostia txirrindularitza-klasikan (abuztuaren 1ean, Bulebarrean), bai Realaren mendeurreneko partiduan (abuztuaren 15ean, Anoetan), bazkideak izen emateko aukera izan dezaten, eta traineruaren proiektua ikusgai egiteko herritarren aurrean. Denden eta ostalarien inplikazioa ere bildu nahi dute zeregin horretan.
Kirol-arloan, Mendi entrenatzaileak adierazi zuen aurtengo asmoa dela proiektuaren oinarriak ezarri eta sendotzea, lan-kultura bat finkatzea eta arraun-estilo bat lantzen hastea. Epe laburrera, Kontxan lan txukuna egitea da helburua, eta hurrengo pausoa, berriz, TKE ligara igotzea.
Jakina, horretarako ezinbestekoa da baliabide ekonomikoak eskura izatea. Ildo horretan lana gogotik egin behar dela jakitun da zuzendaritza berria, eta prest daude proiektua gara dadin behar adinako baliabide horiek eskuratzeko lanerako.
(Argazkia: Diario Vasco).

2009/07/23

Donostiarra (Kaiarriba): Zuzendaritza berria



Donostia Arraun Lagunak taldeko webgunean esaten denez, hau da Kaiarribak izango duen zuzendaritza berria:

Alberto Goitia Larman
(Lehendakaria)
Jose Ramon Iradi Urdanpilleta (Lehendakariordea)
Fermin Tomas Zubeldia Fano (Diruzaina)
Felix Martinez Gracia (Idazkaria)
Jose Manuel Roteta Etxeberria (Bokala)
Javier Nogueras Uribe (Bokala)
Iñaki Santesteban Rotaetxe (Bokala)
- -
Joseba Ubillos Salaberria (Ordezkoa)
Iñaki Otsoa De Uribe Labaien (Ordezkoa)
Jose Maria De Diego Torres (Ordezkoa)

Donostiarra Gipuzkoako Txapelketan

Getarian jokatu den Gipuzkoako Traineru Txapelketan, Donostiarrak zazpigarren postua eskuratu du. Denboraldi osoan Ligan erakutsitako mailari eutsi dio, bere txandan nagusituz KAE-2ko traineruen aurretik nabarmen (minutuko aldea), eta TKEkoetatik urrun (hurbilena 20 segundora).
1. San Pedro 19:26:48
2. Hondarribia 19:27:23
3. Orio 19:45:49
4. Zarautz 19:51:57
5. Pasai Donibane 20:03:20
6. Zumaia 20:11:45
7. Donostiarra 20:31:24
8. Trintxerpe 21:31:01
9. Hibaika 21:41:16

2009/07/18

Nesken diaspora


Aurreko idatzian esaten nizuen hainbat arraunlari donostiar daudela beste herrietako traineruetan. Baina, gizonezkoak bakarrik kontuan hartu eta neskekin ahaztu nintzen.
Donostiako neskek (Ur-Kirolakekoak bereziki) Kontxarako traineru bat atera nahi zutela kontatu nizuen beste mezu honetan, baina ez da ligetan lehiatuko den ontzi donostiarrik uretaratu aurten. Alabaina, gaur HITZAn jakin dugun moduan, badira ligan ari diren beste herrietako tostetan dabiltzan hiru neska donostiar: Amaia Dublang Hondarribian, eta Aloña Gastesi eta Maite Martin Zumaian.

2009/07/16

Eliteko donostiarren diaspora


Gauza jakina da donostiar asko dagoela arraunketaren elitean, Donostiakoak ez diren hainbat trainerutako tostetan sakabanatuta.
TKE ligako puntako traineruetan dabiltzanen berri ematen du gaurko Irutxuloko HITZAk artikulu honetan: Zarautzen ari diren Alain Osanbela eta Unai Luzuriaga; San Pedron diharduten Jon Ander Obiñeta, Lander Larrauri eta Gabi Larrinaga; Castron dabilen Xabier Etxebeste; eta Orion ari diren Haritz Etxebeste, Fernando Balenziaga eta Asier Kolina.
HITZArekin solasean, Ligari buruzko lehen jardunaldietan izan duten esperientzia eta aurrera begira dituzten asmoak azaltzen dituzte.
Maila bikaineko horrelako arraunlari gehienak Donostiako tostetan ikusiko al ditugu etorkizunean...

2009/07/12

Arraun Lagunakeko beteranoak sasoian


Donostia Arraun Lagunak taldeko beteranoek oraindik ere sasoi bete-betean daudela erakutsi dute.
2X eta 8+ ontziek urrezko domina hirukoitza atera dute aurten: Gipuzkoako, Euskadiko eta Espainiako txapelketetan; Orion, ekainaren 14ean, Soustonsen, ekainaren 21ean eta Sevillan, ekainaren 27an, hurrenez hurren.
Hona hemen bi ontzi horien tripulazioak:
2X
Borja Pablos Fernandez
Aitor Irindo Solera
8+
Borja Pablos Fernandez
Aitor Iriondo Solera
Gustavo Canal Lizarbe
Imanol Arruti Guerra
Jose Ramon Berasaluze Erkizia
Joakin Bein Sanchez
Eulogio Genova Emezabal
Joseba Higos Iriarte
Andrea Canal Deleito (Lemazaina)

2009/07/04

Postu eta zale bila, bigarren urtez


Donostiarrak denboraldia nola hasi duen ikusteko, elkarrizketa egin diete Mendi entrenatzaileari eta Jon Lizarralde arraunlariari, gaurko Irutxuloko HITZAn.
Gauza oso zentzuzkoak esaten ditu Mendik bi taldeen osaerari eta helburuei buruz; baita landu beharreko arlo teknikoari eta esfortzuaren kulturari buruz ere. Eta, nola ez, taldeak beharrezkoa duen zalegoari buruz ere zeozer esaten du. Hitz interesgarriak.

2009/06/30

1959: Ur Kirolak supertxapeldun


Gaurko Diario Vascoko alean, Ur Kirolakeko tripulazioek 1959an izandako ongietorriaren berri ematen digu Javier Sadak, garai bateko istorioak kontatuz duen sailean.
Urte hartan, egundoko balentria egin zuen Ur-Kirolak klub donostiarrak, Espainiako Txapelketan urrea lortu baitzuten skiff, 2+, 4+ eta 8+ kategorietan. Garai hobe baten oihartzunak, inondik ere.
Argazkia: Diario Vasco - (Kutxa Fototekak utzia)

2009/06/26

Donostia, Donostiarrarekin txanpan


Atzo, Donostiako hainbat pertsonaia eta erakundek bere elkartasuna adierazi zioten Donostiarrari, Konstituzio plazan egindako ekitaldi batean, Union Artesana soziedadearen ekimenez. Besteak beste honakoak elkartu ziren:
Donostiarrako arraunlariak, Patxi Olabe, Jon Mayoz, Ibai Sistiaga, Andima Martínez, Iñaki Fraile, Lander Clemente, Telmo Yurramendi, Mikel Iradi, Aritz Peiro, Aitor Aranegi eta Gorka Ibarluzea; klubeko zuzendaritzakoak, Antxon Iriarte eta Tomas Zubeldia; Ur-Kirolakeko zuzendaritzakoak, Javier Nogueras eta Ibon Gorraiz; Euskadiko Arraunketa Federazioko presidentea eta Donostia Arraun Lagunakeko presidente ohia, Josetxo Fernandez Bakeriza; Fortunako presidenteordea, Carlos del Río; zinegotziak, Denis Itxaso, Jon Lasa, Duñike Agirrezabala, Xabier Ezeizabarrena, Jaione Arratibel, Mertxe Garmendia, José Luis Arrue, Ainhoa Beola eta Aitziber San Román; Real Sociedad eta GBCko presidenteak, Jokin Aperribai eta Gorka Ramoneda; Bera Berako presidentea, Fernando Díez; Euskal Txirrindularitza Federazioko presidentea, Jose Luis Arrieta; Juantxo Koka pilotaria; kirolaren munduko Txomin Perurena, Kote Olaizola, Enrique Erentxun eta Iñigo Olaizola; Iñigo Argomaniz Get In-eko burua; Rafael Agirre Franco idazlea; A Fuego Negroko eta Bernardo Etxeako sukaldariak, eta Andoni Luis Aduriz sukaldaria; Ramon Agirre eta Jose Ramon Soroiz aktoreak; Union Artesanako Juanjo Beltza eta Gaztelubideko Juan Mari Abad.
Normalean, ez naiz horrelako pertsonaiekin egindako ekitaldien zalea; baina erdi lo dagoen afizioa esnatzeko balio badu, bego. Donostiarrarekin txanpan!!!
(Argazkia: Gorka Estrada - Noticias de Gipuzkoa)

2009/06/21

Donostiarrako plantillak


Hona hemen Donostiarrako bi plantillak; guztira, ari diren 41 arraunlaritik iaz Donostiarran 12 izan ziren (8 Kontxan). 26 arraunlari propioak dira, eta 15 ez propioak.
KAE 1:
Aitor Aranegi
Ander Iriarte
Andima Martinez
Asier Lopez
Ekain Iriarte
Gorka Ibarluzea
Haritz Peiro
Hibai Fuente
Iagoba Bakero
Ibai Sistiaga
Imanol Brit
Iñaki Fraile
Iñigo Collazo
Ion Fidalgo
Jon Lizarralde
Jon Quintana
Jon Sardon
Patxi Olabe
Telmo Yurramendi
Unai Iparragirre
20 hauetatik 9 iaz Donostiarran aritu ziren (7 Kontxan). 12 propio dira, eta 8 ez propio. Aipatzekoa da Asier Lopez patroi beteranoaren itzulera.

KAE 2:
Aitor Casis
Alberto Domingo
Andoni Lizaso
Andres Fernandez
Asier Urdangarin
Ekaitz De Ibero
Elias Arruabarrena
Hodei Abaurrea
Iban Ramos
Jokin Egaña
Jon Mayoz
Jose Manuel Roteta
Lander Clemente
Mauricio Barros
Mikel Iradi
Nikolas Yurramendi
Oier Iurramendi
Ricardo Ponce
Xabier De Diego
Xabier Lezertua
Xabier Zubiri
21 hauetatik 3 iaz Donostiarran izan ziren (1 Kontxan). 14 propio dira, eta 7 ez propio.
Zorte on denoi !!!

2009/06/17

Donostiarrako zuzendaritza uztailaren 27an hautatuko da.


Bazkideei jakinarazi zaienez, uztailaren 27an hautatuko da Donostiarra-Kaiarriba klubeko zuzendaritza berria. Hona hemen hauteskundeen egutegia:

Ekainak 8: hauteskundeen deialdia.
Ekainak 26: hautagaitzak aurkezteko epea hasten da.
Uztailak 3: hautagaitzak aurkezteko epea amaitzen da.
Uztailak 11: hautagaitzen iragarpenerako epea Arraun eta Urkiko sotoetan.
Uztailak 27: Ezohiko Batzar Nagusia, hautagaitza-zerrenden artean zuzendaritza berria hautatzeko.

2009/06/06

Donostiako neskak Kontxan izango dira


Donostiako udalak kirolari buruz argitaratzen duen Mugi aldizkarian esaten denez, Ur-Kirolakeko neskek Kontxako banderan trainerua ateratzeko asmoa dute.
Antza, Donostiako traineru batek parte hartzea besterik ez da asmoa. Berez aulki mugikorra egiten duten neskak dira, eta tostako arraunketaz ez dakite askorik. Hala ere, eskertzekoa da gure bandera nagusian donostiarren presentzia bideratzeko asmo hori.
Ekainaren 19an gehitua: Irutxuloko HITZAn argitaratutako albiste honetan beste argibide batzk ematen dira: 14 arraunlari jubenil eta senior elkartu dira (2 Arraunekoak dira).

2009/06/01

Donostiar arraunzale baten oroitzapenak


Mutil koxkor bat amaren eskutik helduta, tximeletak sabelean, anaiarekin batera ttipi-ttapa Portu kaletik kai alderantz. Horra hor arraunzale koxkero honek arraunari buruz dituen lehen oroitzapenak. Txiki-txikitako oroitzapen kuttun eta maitatuenen artean dauzkat Kontxako estropaden ingurukoak

Goizean goizetiko kaleetako zalapartak esnatuta —etxafuegoak noiznahi, eta, oi, oriotarren sirena puta hura!!... bizi al da?—, eguneko ikuskizunaz gozatzeko prest jaikitzen zen ume mukizu hura. Sukaldeko irratian, nola ez, arraun-kontuak, eta, tarteka, Herri Irratiko arraun-emankizunetan ohikoa izan den trikiti-melodia bixia. Leihora irten eta kalera begira jarri ohi zen mutikoa, zaleen jardunari barre eginez. Nola ez barre egin, adibidez, duela hogeita hamar urte inguru Sotera eta Kaiku animatzera etortzen ziren andre haien kemen iskanbilatsua aurrean izanda? Egunkariei bistadizo bat ematen zien hurrena, ondo ulertzen ez zuen hizkuntza batean idatzitako letren artean traineru eta arraunlarien argazkiak deszifratu nahian-edo… eta, azkenean, entzun nahi zituen hitzen zain geratzen zen: "Umeak, joango al gera?"

Eta, amaren eskutik, anaiarekin batera, ttipi-ttapa kai alderantz. Tximeletak sabelean. Jakina, Portaletan, apustuzale eta artekarien kalaka ezagun hori! "Lasarte-Michelinek bandera ezetz!", "Kaiku honor a que no!", "Sanjuanek Oriori zortzi ezetz!"... Gero, segi pixka bat aurrera, eta, gesala eta gasolioa nahasten dituen kai-usain ahaztezin hori gozatuz, Kaiarriba aldera, zaleen artean erdi bultzaka. Traineruak garraiatzen zituzten orga herdoildu haiek ukitu gabe, badaezpada, eta beroketan aritzen ziren arraunlarien seriotasuna errespetatuta. Idolo anonimoak.

Koskortuagotzean, amaren eskua askatzean (baina sarrera ordaintzeko dirurik eta/edo borondaterik ez zen adin hartan), Trinidade eta San Telmo inguruko txokoren batetik Gaztelu aldera sartu eta Damen Bateria ondoko arroketan ikusten zuen mutiko hark estropada. Kontakizun honen garaian, ordea, Kaiarribako sotoen inguruan, arrapala arranpa gainean geratzen ziren bi anaiak; arraunlari eta traineruen uretaratzea ikusi, eta hantxe, zain... Halako batean, eupada eta animoz betetako zoramen zaratatsua: "Hara! Atera dira!". Eta, ia oharkabean, urrun, urrunegi, traineruak. Megafoniak ematen zuen informazioaren zain egon behar: "Ziabogan, lehena Orio, bigarrena Donostia (bai, izenez "Donostia" huts-hutsik, abizenik gabe)...". Ume haren imaginazioan geratzen ziren arraunlarien nekeak, popa erakutsi ezinaren amorrua, ahaleginaren arnasestua. Eta bat-batean, itzulerako eupada eta animo garrasiak berriro ere, “Hemen dira! Hemen dira!” eta, bukatzeko, denborak megafonian. "Sartu al da Donosti tandadeonorren, ama?"

Pixkanaka, jende andana biltzen hasten zen Kaiarribako arrapalan. Txalo zaparrada lehorreratzen ziren tripulazioentzat. Zale entusiastenak hantxe sartzen ziren uretan, belaunetaraino, patroiari pozezko bizkarrekoak emateko, lepotik helduta erdi itota geratzeko trantzean jartzen ez zutenean. Hain ondo ibili ez zirenak, aldiz, burumakur traineru barruan, zaleen txaloei tristeki eskerrezko agur-keinuak eginez. Haiek ere heroiak ziren, hala ere, heroi anonimoak, dena arreta handiz jarraitzen zuten begitxoentzat. Eta, handik gutxira, ume harentzat galduezina zen eszena: arraunlariek, trainerua bizkarrean jartzeko, ontzia iraultzeko unea. "Ea, ea, adi… kontu hortik… heldu ondo… bat, bi... orain!" eta, itsaso zakarreko egunetan, ur parrastada ontzi barrutik lurrera. Zoragarria.

Gero, etxean beti izaten ziren aitak kontatutako arraun-giroko istorioak: Donostiak ziaboga 1. kalean egin eta 4. kaletik sartu zeneko hura, Rekalde tabernan gizon batek —estropada eguneko edanak gehiegi piztuta-edo— ukabilkada batez adiskidea lurrean zerraldo utzi zueneko hura, puntetatik kanpora nahiko zabar eta alfer antzean arraun eginagatik puntetatik barrura herritarren aurrean dotore eta kementsu arraun egiten zuen beste hark entzun behar izaten zituen errietak, eta beste hainbat eta hainbat istorio...

Ume harentzat, kirolaren alderdi ludikoa eta alderdi emozionala —herri baten afizio izatekoa, kolore jakin bateko jarraitzailea—, hori besterik ez zen arrauna. Baina, haurtzaroa atzean utzi nuenean, ikasi nuen kirol honek bazituela beste alderdi batzuk ere, lehen begi-kolpean agian hain erakargarriak ez direnak, baina, seguruenik, benetan arraunaren muin-muineko zentzua biltzen dutenak bere baitan: neguko hilabete ilun eta ezezagunetan egiten den lan isil eta eskergaitza, lainope goibeletan arraunlariek ia egunero egin behar izaten dituzten saio latzak, kresaletan gazitutako izerdia, bigunak gogortu eta gogorrak bigundu beharra gorputzean, esku-ipurdietako zauri eta kalloak. Udako sariaren zain, abenduko arrats ilun, umel eta izoztu batean trainerua uretaratu eta jo eta su arraunean aritzea guztiz miresgarria da gorputza sufriarazteko abilidadean emaitzarik aurkitu ez dugunontzat. Eta are gehiago —entrenatzaileen egunez eguneko dedikazioa eta direktiboen buruhauste etengabea bezalaxe— ia dena musu -truke edo diru-sari askorik gabe egiten denean, zaletasun hutsagatik. Azken garaiotan ugariagoak diren salbuespen batzuk kenduta noski.

Horregatik, ume koskor izateari aspaldi utzi dion honako hau, udako estropadetan odola emozioz irakinda izan ohi duen arraunzale koxkero hau, neguan eta udaberrian ahal duenean kai aldera itzultzen da, bere koloreak defendatuko dituzten arraunlarien dedikazioaz aho zabalik geratzera. Eta jakin badaki jadanik eskutik heltzen ez dioten ama eta anaia zaharra, kaian paseoan badabiltza, adi geratzen direla Kaiarribako sotoetan mugimendua ikusten badute. Bai eta kostaldeko beste edozein herritan lepoa ur aldera luzatu ere, nonbaitetik estropu hots erritmikoa entzuten badute. Eta Kontxako Banderaren egunetan, edo traineru donostiar bat lehian ari denean, gogora etortzen zaio bere aita zena, nola kontatzen zizkion Donostiako arraunaren inguruko istorioak eta nola joaten ziren elkarrekin Kontxako igande goiz batzuetan kaia, itsasoa, traineruak eta giroa ikusiz gozatzera, txakolin freskagarri bat hartu aurretik.

Hori dena da niretzat arrauna, hori dena dut oroitzapen. Helduaroan odola irakinda sentiarazten dizun edozer eta, batez ere, umetan sabelean tximeletak sentiarazten dizkizun edozer, ez baita, inola ere, ahuntzaren gauerdiko eztula. Ez dezala hori sekula ahaztu eskutik helduta gauza gogoangarri batez gozatzera eramateko moduko umeren bat duen ezein gurasok.